Føroyskt

Fyrisøgn 19

Fyrisøgn 18

6. flokkur í Fuglafjarðar skúla hevur arbeitt við ævintýrum. Hanna hevur verið í bólki saman við einari aðrari gentu og tveimum dreingjum. Tey hava gjørt hugarok um persónar og søgugongd, og Hann hevur teknað ævintýrbrúnna.

Dreingirnir hava litað brúnna, og Hanna og Maria, sum hin gentan eitur, hava klipt og límað persónar, dýr og lutir á hana.

Tey hava øll trý skrivað lyklaorð á brúnna, tí at so er lættari at fara í holt við at skriva.

Flokkurin hevur lisið mong ævintýr, so tey kenna eyðkennini. Tey fýra í bólkinum hava eisini tikið vanligu eyðkennini við. Tey hava ikki skrivað ævintýrið enn, men tey hava hugsað alla søgugongdina.

Tey eru samd um at byrja soleiðis:”Einaferð var tað ein kongur og ein drotning…”

Stílur - Lata inn 6. apríl.

Fyrisøgn 17

Í besta veðri hittast allir 6. flokkar í Føroyum á Svangaskarði á Toftum. Tað er mikudagur 6. mai. Várið er um at vera av, og summarið er í hondum. Blómurnar eru farnar at spretta, og lombini eru komin.

Høgni og Silja eru saman við umleið 600 øðrum børnum á vøllinum á Svangaskarði, har ítróttadagurin í morgun varð settur.

Teirra flokkur er komin í ein bólk saman við flokkum úr Vági, Klaksvík, Fuglafirði og teimum smáu bygdunum í Norðstreymoy.

Tey hava longu runnið um kapp og kastað spjótkast. Onkur bólkur hevur lopið hæddarlop, og onkur annar hevur svomið. Tey, sum fyrst hava spælt fótbólt, hava gingið úr Runavík til ítróttadepilin á Toftum, men hetta er eingin langur teinur.

Høgni heldur tað vera løgið at sita á Svangaskarði og hyggja oman á vøllin í Runavík, samstundis sum hann sær tveir vøllir á Toftum.

Fyrisøgn 16

Í morgun fóru vit tíðliga upp, tí vit skuldu inn í Eysturoynna til ítróttadagin í Runavík og á Toftum.

Vit fóru við bussinum klokkan sjey. Tíbetur er nú undirsjóvartunnil ímillum Vágoy og Streymoy, men mamma tosar altíð um, hvussu strævið tað var at fara úr oynni, áðrenn hann kom, tí tá máttu øll ferðast um Vestmannasund við ferjunum Sam og Ternuni.

Tá vit komu til rundkoyringina í Kollafirði, sóu vit, at onkur hevði hundavenjing, við, Royndarstøðini- Tað kundi eg hugsað mær at sæð. Bussurin steðgaði við Streymin. Har komu børnini úr Vík og Tjørnuvík upp í okkara buss. Tey vóru ikki so mong í tali. Silja kennir eina av gentunum. Hon eitur  Ása. Tær hava verið á legu saman í Vatnsoyrum. Tí ið vit koyrdu millum Fjarða, fortaldi lærarin okkum um gamla tingstaðin í Eysturoynni, Stevnuvál. Mær dámar væl søgur, so eg lurtaði væl eftir.

Hann fortaldi okkum eisini søgnina um Rinkusteinarnar og vísti okkum vegin til Oyndarfjarðar. Eg havi verið har og haldi tað vera løgið, at steinarnir soleiðis standa og ridla.

Vit koyrdu eisini fram við longsta firðinum í Føroyum, Skálafirði. Fram við øllum firðinum liggja bygdir. Tær eru næstan vaksnar saman. Vit vóru á Toftum klokkan 9.00. Bussurin koyrdi okkum niðan á Svangaskarð. Mær dámdi væl at sleppa undan at ganga niðan, tí fyri framman var helst ein strævin dagur.

Fyrisøgn 15

Høgni gleðir seg, tí í morgun segði lærarin teimum, at allir skúlar júst hava fingið teldubræv, ið sigur, at allir 6. flokkar nú kunnu tekna seg til árliga ítróttadagin, sum verður í mai mánaði.

Ítróttadagurin hevur verið hildin í nógv ár, og næmingar hava sum oftast latið væl at degnum.

Høgni hevur altíð verið íðin í ítrótti. Hann hevur spælt bæði fótbólt og hondbólt og hevur eisini runnið nógv. Ítróttin hevur tikið tað mesta av hansara frítíð, so hann ætlar sær við.

Ítróttadagurin hevur verið hildin ymsastaðni í Føroyum. Høgni minnist, at hann einaferð varð hildin í Vágum.

Í ár verður ítróttadagurin í Runavík og á Toftum.

Høgni heldur, at tað er stuttligt at hitta næmingar úr øðrum bygdum í Føroyum. Hann hevur altíð tímað væl at hitt nýggj fólk. Tá er øðrvísi við tvíburasystrini, Silju, sum altíð hevur verið so smæðin, men Høgni veit, at eisini hon hevði fegin viljað torað betur.

Silja hevur íðkað nógvan ítrótt. Hon hevur í mong ár spælt flogbólt við Drátti, og hon hevur eisini riðið nógv.

Høgni og Silja hava tosað um ítróttadagin, og tey eru samd um, at flokkurin so avgjørt eigur at fara við.

Fyrisøgn 14

Góða dagbók!

Nú má eg aftur skriva í góðu dagbók mína. Eg siti í mínum besta stóli inni á kamarinum og skrivi. Eg eri júst komin aftur úr føðingardegnum hjá Jógvani. Vit høvdu tað stuttligt og fingu nógv gott at eta.

Jógvan vísti mær sítt kamar. Tað var lítið, men vakurt og hugnaligt. Aftaná vísti hann mær bøkur sínar. Honum dámar væl at lesa. Eg lovaði honum at sleppa at síggja mínar bøkur eisini, tí eg eigi fleiri, sum hann ikki eigur.

Eg ætli mær eisini at vísa honum mítt kamar. Tað er eitt sindur størri enn hansara, men hansara er líka vakurt sum mítt.

Okkara hús standa nær við skúlan, so eg fari at biðja hann koma beint eftir skúlatíð í morgin.

Nú má eg fara at leggja bøkur mínar í skúlataskuna og taka klæði míni fram til í morgin. Eg veit, at eg altíð havi so ringa tíð um morgunin.

Hanna

Fyrisøgn 13

Góða dagbók!

Nú er seint, so eg fari skjótt at leggja meg. Eg siti í songini og skrivi, meðan eg lurti eftir nýggjastu fløguni hjá mær. Eg haldi, tað er gott at lurta eftir tónleiki, áðrenn eg fari í song, tí so sovni eg altíð beinanvegin. Annars plagi eg onkuntíð at lesa, áðrenn eg leggi meg. Veitst tú, hvat hendi í dag? – eg má siga tær tað. So veit eg, at tað verður okkara millum.

Jógvan í 7. flokki, sum eg havi so góðan hug á, bjóðaði mær í føðingardag hjá sær í morgin. Hvat heldur tú? Eg eri einasta genta í 6. flokki, sum eri boðin við. Nú rokni eg við, at hann eisini leggur eitt sindur í meg.

Eg gleði meg so nógv til í morgin. Eg skrivi aftur í annaðkvøld. Tá verður helst okkurt spennandi at skriva um.

Hanna

Fyrisøgn 12

Klaksvík, t. __________

Góði Høgnar!

Bara ein lítil heilsa frá mær. Eg havi nakað stuttligt at siga tær. Fyri einum mánaði síðan teknaði eg eina teknisøgu og skrivaði tekst til eina kapping, sum Barnablaðið skipaði fyri. Í gjár kom bræv við postinum. Brævið var frá Barnablaðnum. Eg tordi næstan ikki at lata tað upp, men gjørdi tað kortini. Í brævinum stóð, at mín teknisøga gjørdist nummar tvey í kappingini. Hvat heldur tú? Eg eri bæði glað og errin.

Í næstu viku fari eg til Víkar at vitja Ásu. Hon hevur brotið beinið og gongur á høkjum. Hon fær næstan einki gjørt. Tó var hon heppin bara at bróta beinið í einum stað. Hon kundi eins væl eisini havt brotið knæið ella lærið.

Eg komi skjótt til Vágs at ferðast. Nær kemur tú til Klaksvíkar?

Skriva skjótt aftur.

 

Blíðar heilsanir

Beinta

Fyrisøgn 11

Hanna fer til hús við bókini “Regin og Sára”. Hon er glað, at bókavørðurin hevur lært hana sjálva at finna bøkurnar á bókasavninum, tí so sleppur hon undan altíð at spyrja onkran til ráðs.

Hanna gleðir seg til at lesa bókina. Hon kennir fleiri onnur, sum hava lisið hana. Øll láta væl at henni. Tá hon var í Vík og vitjaði Ásu, var Ása júst liðug við hana.

Tá Hanna kemur til hús, fer hon inn í kamarið. Hon leggur seg væl til rættis á sofuni, tendrar lampuna, setur eina góða fløgu í fløguspælaran og leggur seg at lesa.

Honnu dámar væl at lesa og lurta eftir tónleiki samstundis.

 

Fyrisøgn 10

Tvær vikur eftir, at Beinta hevði sent teknisøguna til kappingina í Barnablaðnum, fekk hon eitt bræv sendandi. Brævið var frá Barnablaðnum

Beinta var so spent, tí kanska hevði hon vunnið virðisløn í kappingini. Hon tordi næsta ikki at lata brævbjálvan upp. Hon legði hann á borðið. Kanska  skuldi hon bíða at lata upp brævbjálvan, til foreldrini komu til hús.

Nei, hon var ov forvitin. Hon kundi ikki bíða so leingi. Hon tók ein knív úr skuffuni, spretti upp brævbjálvan og tók úr pappírið, sum lá í honum.

Har stóð.

 

Góða Beinta!

Vit skulu siga tær frá, at tú gjørdist nummar tvey 50 í kappingini at skriva teknisøgur. Vinningurin er ein fartelefon við 200 krónum í talutíð, sum tú fært sendandi í næstu viku.

Nevndin segði soleiðis um tína teknisøgu: “Ein sera góð søga við framúr góðum tekningum. Er sera væl úr hondum greidd.

Fyrsta virðisløn, sum er ein diskmaður við 10 nýggjum fløgum, fekk Janus Ólason úr Mikladali.

Blíðar heilsanir

Barnablaðið

Fyrisøgn 9

Allir næmingarnir í 6. flokki í Føroyum kunnu vera við í eini teknisøgukapping, sum Barnablaðið skipar fyri.

Beinta ætlar sær at gera eina søgu um eina gentu, sum hevur fingið ein hvølp. Hon veit ikki heilt, hvussu hon skal tekna myndirnar, og hvørjum hon skal byrja við.

Hon ringir tí til Høgnar. Hon ætlar at spyrja hann, hvat hann heldur, tí hon veit, at Høgnar dugir so væl at tekna og at finna uppá.

Høgnar er ikki inni. Mamma hansara sigur, at hann er farin til Hvalbiar og kemur ikki aftur fyrr enn í annaðkvøld.

Beinta roynir so sum best. Hon situr alt kvøldið inni í stovuni og teknar. Hon er einsamøll inni, so alt er kvirt. Mamman og pápin eru í Hvannasundi og vitja ommuna.

Tá ið tey koma aftur, er Beinta liðug at tekna allar myndirnar.

Fyrisøgn 8                                                                                                                               

Tað er tíðliga um morgunin. Hanna liggur í songini, hon er júst vaknað. Hon liggur og hugsar um, at hon fyllir í dag.

Munnu mamman og pápin koma inn at vekja hana við morgunmati og føðingardagsgávu?

Hon hoyrir okkurt skava uttan fyri kamarsdyrnar. Hon fær eitt hugskot. Hon skal látast at sova.

Hurðin verður spakuliga gloppað. Hon hoyrir foreldrini teska, at tey skulu vera friðarlig.

Pápin stígur á okkurt, sum liggur á gólvinum. Hann fær ilt og rópar.

Hanna støkkur upp, og mamman er um at missa alt úr hondunum. Eina løtu hyggja øll trý hvørt upp á annað, men so fara tey at flenna.

Uppgáva til mánadagin 15. nov. 2021

Hetta skulu tit gera heima til mánadagin 15. november. 

Bólkur 1

·       Lea – Lesa og skriva um kap. 15

·       Maria – Lesa og skriva um kap. 16

·       Ró – Lesa og skriva um kap. 17

Bólkur 2

·       Anna – Lesa og skriva um kap. 15

·       Margret – Lesa og skriva um kap. 16

·       Annfríð – Lesa og skriva um kap. 17

Bólkur 3

·       Hans Dávid – Lesa og skriva um kap. 15

·       Jóhannes – Lesa og skriva um kap. 16

·       Róland – Lesa og skriva um kap. 17

Bólkur 4

·       Ari – Lesa og skriva um kap. 15

·       Árni – Lesa og skriva um kap. 16

·       Theodor – Lesa og skriva um kap. 17

·       Ábraham – Lesa og skriva um kap. 18

Stílur - Latast inn 17. nov. 2021

Uppseting av stíli (framseting)

 Skriva við ”Times New Roman”

 Yvirskrift við stødd 16, og tekstin annars við stødd 12

 Reglumillumrúm 1.5

 Reglubrot skulu vísast við dupultum regluskifti

 Breddin skal vera líka í høgru og vinstru síðu

Fyrisøgn 7                                           

Høgni gongur fyri seg sjálvan í skúlagarðinum. Hann veit ikki, hvussu hann skal bera seg at, so hann sleppur at spæla við hini børnini aftur. Í morgun hevði lærarin sagt: «Pengar eru tiknir úr lummanum hjá Rana fyrsta tíma í morgun, og vit mugu fáa at vita, hvør tykkara var úti fyrsta tíma.»

Høgni hevði verið úti á vesinum fyrsta tíma í morgun, men hann hevði ikki tikið pengarnar. Men hvussu skuldi hann prógva tað? Øll hini í flokkinum høvdu hugt so undarliga at honum, og nú gongur hann her púra einsamallur.

«Tjóvur, tjóvur,» hoyrir hann brádliga eitt rópa eftir sær. Tað er Óli, sum hann gongur í flokki saman við. Høgni mennir seg upp og rópar aftur: «Tað var ikki eg, og eg ætli mær at prógva, at eg eri ósekur.»

«Hvussu kanst tú tað?» rópar hin aftur. Høgni svarar ikki.

Í somu løtu sær hann Rana koma yvir ímóti sær. Rani sær heldur hámur út, tá ið hann sigu: ”Høgni, eg biði um umbering. Mamma var her við pengunum í áðni. Eg hevði lagt teir eftir á borðinum í morgun.»