Sorgarætlan

Sorgarætlan fyri Viðareiðis skúla

Heitt verður á foreldur ella avvarðandi um at boða leiðslu skúlans frá, um næmingur doyr ella missir ein av sínum næstu.

Í Viðareiðis skúla hava vit gjørt eina sorgarætlan fyri skúlan, sum skal vera okkara amboð at nýta í teimum førum, har vit hava onkran, sum verður raktur av sorg. Sorgarætlanin skal somuleiðis gera okkum lærarar og starvsfólk á skúlanum tilvitað um tann leiklut, sum vit hava í arbeiði okkara, tá ið tað snýr seg um at hjálpa teimum næmingum, ið vit hava ábyrgdina av.

Endamálið er sostatt, í greiðum orðum at siga, hvussu vit gera, tá ið sjúka, vanlukka ella deyði rakar okkum í skúlanum ella ein av okkara nærmastu.

Um næmingur er leingi burtur vegna sjúku ella annað

  • Flokslærarin hevur ábyrgd av at tosað verður við heimið
  • Flokslærarin kunnar hinar lærararnar
  • Flokslærarin kunnar floksfelagarnar
  • Flokslærarin fylgir við hvussu gongur
  • Um stig verður tikið til tiltøk, vitjanir ella annað skipar flokslærarin fyri

Tá ið næmingur doyr

  • Doyr næmingur, boðar skúlaleiðarin lærarum skúlans frá, áðrenn skúladagurin byrjar
  • Flaggið verður vundið í hálva stong
  • Skúlaleiðarin og flokslærarin tosar við foreldrini og bera flokkinum boðini
  • Skipað verður fyri felags morgunsangi í skúlanum, har tøgn verður hildin í ein minuttSkúlaleiðarin og flokslærari fara í heimið at vísa samkenslu
  • Skúlin skipar fyri minningarhaldi, og foreldur kunnu koma við
  • Flokslærarin kunnar flokkin um, jarðarferð og annað
  • Skúlin sendir minnisgávu ella krans
  • Skúlaleiðarin, flokslærarin og aðrir lærara fara at fylgja
  • Næmingar kunnu fylgja saman við foreldrum/avvarðandi

Tiltøk, sum skúlin kann taka stig til

  • Skúlaleiðarin kann biðja um serkøna hjálp uttan í frá. M.a. frá presti, samkomuleiðara,        sjúkrarøktarfrøðingi, sálarfrøðingi ella øðrum
  • Skúlin skipar fyri minningarhaldi í skúlanum
  • Foreldur kunnu koma við til minningarhaldið
  • Vanliga tímatalvan verður niðurløgd, so lærarar og næmingar fáa møguleika at tosa um tað,           sum er hent
  • Minnast viðkomandi á fyrsta foreldrafundi aftaná

Um systkin ganga í skúlanum

  • Flokslærarin tosar við heimið
  • Flokslærarin gera ætlan fyri dagin, tá tey koma í skúla aftur

Tá ið lærari doyr

Skúlaleiðarin setur seg í samband við familjuna.

  • Skúlaleiðarin boðar lærarum skúlans frá
  • Flokslærararnir kunna flokkarnar
  • Flaggið verður vundið í hálva stong
  • Næmingarnir, sum hava læraran, fáa serliga kunning
  • Felags morgunsangur og minningarhald
  • Foreldur og avvarðandi kunnu koma við til minningarhaldið
  • Skúlin sendir minnisgávu ella krans
  • Lærarar fara til jarðarferð
  • Næmingar kunnu fylgja saman við foreldrum/avvarðandi

Tiltøk í samband við at lærari doyr

  • Vanliga tímatalvan verður niðurløgd, so lærarar og næmingar fáa møguleika at tosa um tað, sum er hent

Missur hjá tí einstaka í sambandi við álvarsliga sjúku, vanlukku ella deyða

  • Um boðini koma í skúlatíð, og avvarðandi ikki sjálvi kunnu geva barninum boðini, verður mælt til, at skúlaleiðarin ella flokslærarin geva boðini á hóskandi stað og taka sær av viðkomandi til loysn verður funnin
  • Um avvarðandi sjálvi koma í skúlan, verður sama mannagongd fylgd
  • Flokslærarin kunnar allar lærarar í flokkinum um sjúkuna ella vanlukkuna
  • Flokslærarin kunnar flokkin um støðuna
  • Flokslærarin kunnar foreldrini um, at tosað verður um málið í flokkinum
  • Eru fleiri systkin í skúlanum, mugu allir lærara tosa saman, so at felags mannagongd verður fylgd
  • Fylgja væl við næmingum, hvørs foreldur eru sjúk ella deyð
  • Fylgja við um broytingar eru í atferðini hjá barninum

Tiltøk framyvir

  • Á føðingardegnum hjá tí deyða verður prátað um tann, sum farin er
  • Flokslærarin tosar við lærararnar, sum hava flokkin, um støðuna í flokkinum
  • Lærararnir, sum eru um flokkin, mugu vísa tolsemi, fyrilit og umhugsni, tí tað kann taka langa tíð hjá børnum at koma yvir kreppu og sorg, sum tey eru komin í